"हिंसामुक्त समाज सभ्य समाजको आधार हो। लैङ्गिक भेदभाव, हिंसा र दुर्व्यवहार रहित न्यायपूर्ण समाजको निर्माणमा ऐक्यबद्धता जनाउँदै समाजमा विद्यमान हानिकारक अभ्यासहरू (बालविवाह, दाइजो, तिलक, छाउपडी, लिङ्ग पहिचान सहितको गर्भपतन, बोक्सीको आरोप, जातीय छुवाछुत र विभेद आदी) र महिला माथि हुने कुनै पनि हिंसा हामी गर्दैनौँ, सहन्नौँ र भएमा सशक्त प्रतिकार गर्ने सामूहिक प्रतिबद्धता गर्दछौ।"
आज २५ नोभेम्बर २०२१ का दिन मनाइने महिला हिंसा विरुद्धको अन्तर्राष्ट्रिय दिवसका साथ-साथै आजै देखी सुरु हुने महिला हिंसा विरुद्धको १६ दिने अभियानका अवसरमा यसरी सबै आदरणीय उपस्थितले आ-आफ्नो बलियो समर्थन दिनु भएको छ। माननीय महिला, बालबालिका तथा ज्येष्ठ नागरिक मन्त्री उमा रेग्मीज्यू , राष्ट्रिय महिला आयोगको माननीय अध्यक्ष कमला कुमारी पराजुलीज्यू र सदस्यहरू कृष्ण कुमारी खतिवडाज्यू तथा सावित्रा कुमारी शर्माज्यू एवम् विभिन्न संवैधानिक निकायका सदस्यज्यूहरू, विकास साझेदार संस्थाहरूका प्रमुख तथा प्रतिनिधिज्यूहरू , महिला अधिकारी तथा अभियन्ताज्यूहरू , आदरणीय सञ्चारकर्मीज्यूहरु , नेपाल सरकारका विशिष्ट श्रेणीका सबै कर्मचारीहरू, महिला हक, हित र अधिकारका लागि निरन्तर लागिरहनु भएका सामाजिक अभियन्ताज्यूहरू , महिला अधिकारकर्मी र समानताको पक्षमा अनवरत कलम चलाइरहनु भएका लेखक, साहित्यकार तथा सञ्चारकर्मी साथीहरूको माझमा राष्ट्रिय महिला आयोगमा यो प्रतिबद्धता गरिएको हो।