बलात्कार पछि हत्या भएको भनिएको बैतडीको दोगडाकेदारको घटनाका दोषीलाई कानूनको दायरामा ल्याइ निष्पक्ष र प्रभावकारी अनुसन्धान गर्न आग्रह
बैतडी जिल्लाको दोगडाकेदार गाउँपालिका वडा नं ७ स्थित श्री सनातन धर्म मा.वि. खोचलेकमा कक्षा १२ मा अध्ययनरत १७ वर्षीया किशोरी भगिरथी भट्ट मिति २०७७ माघ २१ गते दिउँसोबाट हराएर भोलिपल्ट दिउँसो करिव ४:३० बजे लवलेक सामुदायिक वनमा शंकास्पद विभत्स अवस्थामा मृत भेटिएको भनिएको घटना प्रति यस आयोगको गम्भीर ध्यानाकर्षण भएको छ । घटनाको अनुगमन तथा अनुसन्धानका लागि आयोगले राष्ट्रिय मानव अधिकार आयोगसँग समेत छलफल गरेको छ । हिंसाजन्य यस्ता गम्भीर घटनाले व्यक्तिको जिउ ज्यानको सुरक्षा र मानव अधिकारको गम्भीर उल्लघंन भएको कुरा महशुस गरिएको छ । उक्त घटनाको अनुगमन तथा अनुसन्धानका लागि तत्कालै आयोगले यस आयोगका माननीय सदस्यको नेतृत्वमा टोली गठन गरेको छ । आयोगको उक्त टोलीलाई आवश्यक सहयोग पुर्याइदिनु हुन आयोग सम्बन्धित सबै पक्ष तथा सरोकारवालाहरुलाई आग्रह गर्दछ । आगामी दिनमा यस प्रकारका घटना दोहोरिन नदिनेतर्फ सचेत रहँदै निष्पक्ष र प्रभावकारी अनुसन्धान मार्फत घटनाको सत्यतथ्य उजागर गरी दोषीलाई कानून बमोजिम कारवाहीको दायरामा ल्याउन र पीडित परिवारको सुरक्षा तथा न्यायमा पहुँच पुर्याउन आयोग नेपाल सरकारको ध्यानाकर्षण गराउँदछ ।
शान्ता अधिकारी भट्टराई
सचिव